அவாரிய மலைப் பிரவாகம்!

லட்சியவாதங்கள், திடுக்கிடும் திருப்பங்கள் கொண்ட துப்பறியும் நாவல்கள், யதார்த்த இலக்கியங்கள், விஞ்ஞான புனைகதைகள், மாயாவாத இலக்கியங்கள் என தமிழ் வாசகனுக்கு சகல நாவல் வாசிப்பு அனுபவங்களும் கைகூடியிருக்கிறது. மிகச் சிறிய குழுவாக இருந்தாலும் அந்த வாசகக் கூட்டத்துக்கு எழுத்துலக "நல்லது கெட்டதுகள்' ஓரளவுக்குக் கைகூடியிருக்கிறது.
இந்த எல்லாவற்றிலும் ஹாஸ்யம், துன்பியில், நையாண்டி, புரட்சிகரம், மங்கலகரம் புத்திசாலித்தனம் விறுவிறுப்பு எல்லாமும் உள்ளடங்கியிருக்கிறது. கதைக்களம் அல்லது எழுத்து நடை இதைத் தீர்மானிக்கிறது.
ஒரு புத்தகத்தை வாசிக்கத் துவங்குகிற முதல் இரண்டு மூன்று பக்கங்களிலேயே நாம் ஒரு முடிவுக்கு வந்துவிடுகிறோம். அதாவது இந்தப் புத்தகம் மேலே சொன்னவற்றில் எந்த ரகம் என்பதில்.
மண் கட்டியைக் காற்று அடித்துப் போகாது நூலிலும் அப்படி ஒரு முடிவுக்கு வருவதற்கு நான் முதல் சில பக்கங்களைப் புரட்டிக் கொண்டு வந்தேன். ஒரு முடிவுக்கு வருவதற்காகவே நிறைய பக்கங்களைப் படித்து, முடிவு செய்துவிட்டுத்தான் படிக்க வேண்டும் என்ற அவசியத்தை மாற்றிவிட்டது நாவல்.
ஃப்ளாஷ் பேக் உத்தியில் ஒரு பெண்ணின் நீண்ட நினைவுப் பதிவாக விரிகிறது கதை.
நமக்குச் சற்றும் பழக்கமில்லாத பின்னணியில் நகர்கிறது கதை. அவாரிய மலைவாழ் மக்களின் வாழ்க்கை. மலையும் மலைசார்ந்த இடமும்தானே என குறிஞ்சித் திணையைக் கற்பனை செய்து கொள்ள முடியுமா? தேனோ, தினைமாவோ முருகனோ இல்லை. அதற்கு பதிலாக வேறு உணவுகள். கொழுக்க வைத்த மாட்டிறைச்சி.. பாலாடைக்கட்டி, ரொட்டி... முருகனுக்குப் பதில் அல்லா. அங்கிருக்கும் உணவு வேறு, உடைகள் வேறு. பேசும் மொழிவேறு, ஊர் பெயர் ஆசாமிகளின் பெயர் எல்லாம் வேறு.
வெளிநாட்டு இலக்கியங்களைப் படிக்கும்போது எப்போதும் ஏற்படும் உணர்வுதான். ஆனால் நம்மையும் அவர்களையும் இணைக்கும் பொது அம்சம் அது சவால் நிறைந்த இன்னொரு வாழ்க்கையைச் சொல்கிறதா என்பதில்தான் இருக்கிறது. அது காதலிக்கிறவன் கதையோ, கட்டடம் கட்டுகிறவன் கதையோ.. இன்னொரு மனிதனின் சவாலைச் சொல்கிறது, பிரச்சினையைச் சொல்கிறது என்பதுதான் இத்தனைத் தடைகளையும் மீறி நம்மை படிக்க உந்துகிறது. ஷேக்ஸ்பியர் படித்திருக்கிறாயா, டால்ஸ்டாய் படித்திருக்கிறாயா, மார்க்வெஸ் படித்திருக்கிறாயா என்று பேச வைக்கிறது.
பஞ்ச தந்திரக் கதையாக இருந்தாலும் பஞ்ச பாண்டவர் கதையாக இருந்தாலும் பரந்தாமன் கதையாக இருந்தாலும் அவற்றில் வரும் நரியையோ, எம் பெருமான் நாராயணனையோ நாம் மனிதர்களாகத்தான் பார்க்கிறோம். மனித குணங்களை ஏற்றி அவை எதிர் கொள்ளும் பிரச்சினைகளைத்தான் பார்க்கிறோம். அதனால்தான் மனைவியை மீட்க ராமர் பாலம் கட்ட வேண்டியிருக்கிறது. பெண்ணாசை, மண்ணாசை, பொன்னாசை எல்லாம் பின்னே காட்டு விலங்குகளுக்கும் கடவுளுக்குமா பொருந்தும்?
ஆனால் அது இந்த நாவலில் வரும் அவாரிய மக்களுக்குப் பொருந்துகிறது.
மலையில் இருந்து அருவி கொட்டும் சீஸன் ஆரம்பிக்கிறது. முதலில் அதைப் பார்க்கிறவர்கள் என்ன வேண்டும் என்று வேண்டிக் கொள்கிறார்களோ அது நிறைவேறும் என்பது சம்பிரதாயம். பாத்திமாத் என்ற சிறுமி இறந்து போன தன் தந்தை (அகமது) திரும்ப வருவாரா என்று நிராசை கொள்கிறாள்.
மலையில் இருந்து விழும் நீர் எப்படிப் பொங்கிப் பாயுமோ அப்படியேதான் கதையும் நகர்கிறது.
அந்தச் சிறுமியின் தந்தை எப்படி இறந்தான்? அது இயற்கையான மரணம்தானா? பின்னணியில் இருந்த சதி என்ன? பாத்திமாத்தோடு சேர்ந்து மூன்று பெண் குழந்தைகளையும் வைத்துக் கொண்டு அகமதின் மனைவி பரீஹான் எப்படிக் குடும்பம் நடத்துகிறாள். அவர்களுக்கு உதவும் உமர்தாதா} ஹலூன் தம்பதிகள். அவர்களின் மகன்கள். பரீஹானை அடைய வெறி கொண்டு அலையும் ஜமால். அவனுடைய மகனுக்கு பாத்திமாத்துக்கும் ஏற்படும் காதல் பரவசம்.உமர்தாதாவின் மகனுக்கும் பாத்திமாத்துக்கும் திருமணம் செய்ய பெரியவர்களின் விருப்பம். காதல் முக்கோணத்தில் பாத்திமாத்தின் கவலை. பரீஹான் மீது விழும் கொலைப் பழி. நீதிபதிகளின் முன்னால் வைக்கப்படும் பரபரப்பான ஆதாரம். இரண்டாம் உலகப் போர். அது காவு கொள்ளும் காதல்கள். அத்தனை நிகழ்வுகளுமே அருவி நீரின் பிரவாகத்தோடு சுணக்கமின்றி நகர்கின்றன.
நாம் எப்படி யூகிக்கிறோமோ அப்படியே நகரும் கதையாக இருக்கிறது இது. அப்படி நாம் யூகிப்பதற்கான காரணங்களையும் நாவலின் ஆசிரியரே டிப்ஸ் தருகிறார். நாவல் எழுதும் யாரும் இப்படித் துணிவார்களா என்பது தெரியவில்லை. இந்த நாவல் எப்படி முடியப் போகிறது என்பதும் நாவலின் திருப்பமான விஷயங்கள் என்ன என்பதும் நாவலின் நடுநடுவே சொல்லப்பட்டுவிடுமாயின் அந்த நாவலை மேற்கொண்டு படிப்பதில் என்ன சுவாரஸ்யம் இருக்கமுடியும் என்று நினைப்பது சகஜம்தான்.
உதாரணத்துக்கு அகமது மரணத்தில் சந்தேகம் இருப்பது முதலிலேயே சொல்லப்படுகிறது. ஆனால் அதையும் மீறி நாவலைப் படிக்க வைப்பது உமர்தாதா என்ற விவசாயக் கிழவன். மண்ணை அவன் நேசிப்பது போல வேறொருவர் நேசிக்க முடியுமா என்று தெரியவில்லை. அவனுடைய தைரியமும் உழைப்பும் நேர்மையும் தியாகமும்தான் நாவலுக்கு நீடித்த சுவாரஸ்யத்தைத் தருகிறது என்பது என் கருத்து. கதையைச் சொல்லிச் செல்வதாக வரும் பாத்திமாத்தோ, கணவனோ பாத்திமாத்தின் தந்தையோ தாயோ அல்ல நாவலின் கதாநாயகன். உமர்தாதா... ஆமாம் அவர்தான்.
மனிதர்களிடம் அவர் காட்டும் கருணை, அநீதியை அவர் தட்டிக் கேட்கும் துணிவு .
அவருடைய பேச்சில் தொனிக்கிற வாழ்வின் அனுபவத் தெறிப்புகள் நிச்சயம் உலகத்துப் பெரிய மனிதர்களுக்கெல்லாம் பொது குணமாக இருக்கும் என்பதை நம்ப வைக்கிறது. எல்லா மறுமொழிகளுக்குமே அவருக்குப் பழமொழிகளே பதிலாக அமைவது பிரமிக்க வைக்கிறது. மண்கட்டியைக் காற்று அடித்துப் போகாது உட்பட அவருடைய பழமொழிகள் நாவெலெங்கும். பாஸþ அலியெவா அவருடைய சொந்தக் கதை இது என்று சொல்லியிருக்கிறார். அவருடைய மூன்று சகோதரிகள்தான் இதில் இடம் பெற்றிருக்கிறார்கள் என்றும் கூறியிருக்கிறார். இந்தக் கதையில் வரும் பரீஹான் இந்த நாவல் புத்தகமானபோது உயிருடன் இருப்பதாகவும் முன்னுரையில் கூறியிருக்கிறார்.
உண்மைக் கதை எப்போதும் அதன் சுட்டெறிக்கும் வெப்பத்துடன்தான் இருக்கிறது.



தமிழ்மகன்



மண் கட்டியைக் காற்று அடித்துப் போகாது
பாஸþ அலீயெவா
மொழி பெயர்ப்பாளர்: பூ. சோமசுந்தரம்
நியூ செஞ்சுரி புக் ஹவுஸ் (பி) லிட்.
அம்பத்தூர்,சென்னை }98.

விலை ரூ. 140

சிறுகதை -சவீதா முத்துகிருஷ்ணன் சிந்தனைகள்

என் மகள் கொண்டு வந்த அந்த அழகிய சிறிய புத்தகம் குழந்தைகளுக்கான குட்டிக் கதைகள் அடங்கிய புத்தகமாகத்தான் இருக்கும் என்று நினைத்தேன். ஆனால் பள்ளியிலிருந்து கொண்டுவரப்பட்டதிலிருந்து என் மகளால் படிக்கப்படாமல் டேபிளின் மீதே மூன்று நாள்களாகக் கிடந்ததால் அது ஒருவேளை பெற்றோர்களுக்கான புத்தகமோ என்று தோன்றியது. இரவு சாப்பாடு முடிந்து தூங்குவதற்கு முந்தைய ஒரு அசமந்தமான நேரமாக இருந்ததால் அந்தப் புத்தகத்தைக் கண்ணுற்றேன்.
ஏனென்றால் பெற்றோர்}ஆசிரியர் கூட்டத்தில் அந்தப் புத்தகம் வெளியிடப்பட்டது. அந்தப் பள்ளியின் தாளாளர் எழுதிய புத்தகம் என்றும் அதற்காக குழந்தைகள் எல்லோரும் தலா 25 ரூபாய் கொண்டு வர வேண்டும் என்றும் கூறப்பட்டிருந்தது.
ஆசிரியர்களைச் சந்திப்பது என்பது நான் குழந்தையாக இருக்கும்போதிலிருந்தே பிடிக்காமல் போய்விட்டதால் நான் ஒவ்வொரு முறையும் எப்படியாவது அந்தக் கூட்டங்களைத் தவிர்த்துவிடுவேன். குழந்தைகளின் படிப்பு மேம்படுவதற்காக அவர்கள் சொல்கிற ஒவ்வொரு உத்தியையும் மீற வேண்டும் என்று தோன்றுவதுதான் முதல் காரணம். உதாரணத்துக்கு "தினமும் இரவு 10 மணிவரை படிக்க வேண்டும். காலையில் நான்கு மணிக்கு எழுந்திருந்து படிப்பைத் தொடர வேண்டும்' என்பது குழந்தைகள் படிப்பதற்கான ஓர் உத்தி.
""நானெல்லாம் படித்த காலத்தில் பள்ளிக்கூடத்தில் படித்ததோடு சரி'' என்று மனைவியிடம் சொல்வேன்.
""அதான் இப்படி இருக்கிறீர்கள்'' என்பாள் வெடுக்கென.
""வீட்டில் இத்தனை மணி நேரம் படிப்பதற்கு பள்ளிக்கூடம் எதற்காக?''
""பசங்க நல்லா படிக்கறதுக்குத்தான்''
""கொஞ்சமாகப் படித்தால் போதும்''
""நல்லது என்றாலே பிடிக்காதே''
ஒவ்வொருவருக்கு ஒவ்வொரு விஷயம் நல்லதாக இருக்கிறது. எனக்கு நல்லதாக இருப்பது பெரும்பாலும் கெட்டது என்பது என் மனைவியின் சுலப அபிப்ராயம்.
இப்படியான எண்ண ஓட்டத்தோடுதான் அந்தப் புத்தகத்தை எடுத்தேன். புத்தகத்தின் தலைப்பு "சவீதா முத்துகிருஷ்ணன் சிந்தனைகள்'.
சவீதா மெட்ரிகுலேஷன் பள்ளியின் தாளாளர் முத்துகிருஷ்ணன் எழுதிய சிந்தனைத் துளிகள் என்பது புரிந்தது. குழந்தைகள் படிப்பைக் குறித்த உத்திகள் அதில் இருக்கும் என்று நான் நம்பினேன். ஆனால் அதில் அப்படியில்லை.
உழைத்தால் உயர்வு கிட்டும், உண்மை பேசு, அன்பே சிறந்தது, கூடி வாழ்ந்தால் குடி உயரும்,எளியவர்க்கு உதவினால் தர்மம் தலை காக்கும் என்ற ரீதியில் அவர் பக்கம் பக்கமாக எழுதித் தள்ளியிருந்தார். இது எதிர் பார்க்காத திருப்பம். என்னால் நம்பவே முடியவில்லை. மனித இனம் தோன்றிய காலம் தொட்டுச் சொல்லப்பட்டு வருகிற இத்தகைய அறிவுரைகளை ஒரு மனிதர் தம்முடைய சிந்தனைகளாக சொல்லிக் கொள்வதும் புத்தகமாகப் பிரசுரிப்பதும் மிகப் பெரிய அநீதியாக இருந்தது.
பள்ளி மாணவர்கள் 848 பேரும் அந்தப் புத்தகத்தை விலை கொடுத்து வாங்கியிருக்கிறார்கள். யாருக்குமே இந்த அக்கிரமத்தைத் தட்டிக் கேட்க முடியவில்லையா என்பது மேலும் அதிர்ச்சியாக இருந்தது எனக்கு. ஒரே நாளில் 848 பிரதிகள் விற்பது என்பது தமிழ் நூல் உலக வரலாற்றில் ஒரு மகத்தான சாதனை. சொல்லப் போனால் முதல் சாதனையாகவும் இருக்கும் என்று நினைத்தேன்.
ஒரு சிறுகதை தொகுதி வெளியிட்டுவிட்டு நூலக ஆணை கிடைக்கப் பெறாமல் அந்த ஆயிரம் பிரதிகளையும் இண்டு இடுக்கு வீட்டில் வைத்து கரையானுக்குப் பாதி, அன்பளிப்பு மீதி என்று அவதிப்பட்டவனுக்குத்தான் சவீதா முத்துகிருஷ்ணன் என்ற எழுத்தாளனுக்குள் ஒளிந்திருக்கிற சாமர்த்தியம் தெரியும்.

""என்னது "என்ன இது அநியாயம்?' அவன் பண்ணினதும்தான் அநியாயம்'' என்று என் மனைவி தொலைக்காட்சி சீரியலைப் பார்த்து ஏதோ சொன்னாள். நான் மனதுக்குள் நினைத்தது வாய்வழி முணகலாகவே வெளிப்பட்டிருக்கிறது. டி.வி.யில் வேறு ஏதோ அநியாயம் நடந்து கொண்டிருக்கிறது போலும்.
""இந்தப் புத்தகத்தை ரமேஷ் வீட்டிலும் வாங்கினாங்களா?''
""எந்த புத்தகம்?''
""சவீதா முத்துகிருஷ்ணன் சிந்தனைகள்''
அப்போதுதான் ஞாபகம் வந்தவளாக என் கையில் இருந்த புத்தகத்தை கவனமாகப் பார்த்தாள்.
""எல்லோரும்தான் வாங்கியாகணும்''
""சட்டமா?''
""உன் கிட்ட பேசி ஜெயிக்க முடியாது''
""ரமேஷ் அப்பா இந்தப் புத்தகத்தைப் பார்த்தாரா?''
""அதெல்லாம் எனக்குத் தெரியாது''
ரமேஷ் வீடு எங்கள் வீட்டுக்கு இரண்டு வீடு தள்ளிதான். நான் நேராகவே ரமேஷ் வீட்டுக்குப் போய் அவருடைய அப்பாவைத் துணைக்கு அழைத்தேன். அவர் மேற்படி புத்தகத்தை அவர் வீட்டில் இருந்த இரண்டே புத்தகங்களான விநாயகர் அகவல், திருப்பாவை ஆகியவற்றுக்கு அடுத்து இந்தப் புத்தகத்தையும் வைத்திருந்தார். புத்தகத்தின் சைஸ் காரணமாக அங்கு அடுக்கியிருக்கலாம்.
விஷயத்தை விளக்கி, காலம் காலமாக புத்தரும் ஒüவையாரும் திருவள்ளுவரும் இரண்டாயிரம் ஆண்டுகளாகச் சொல்லிக் கொண்டிருப்பதை ஒரு மனிதர் தன்னுடைய சிந்தனைகளாகப் புத்தகம் எழுதி வெளியிட்டிருப்பதுடன் அதை வாங்கியே ஆக வேண்டும் என்று 25 ரூபாய் வேறு வாங்கிவிட்டதைச் சொன்னேன்.
""பரவாயில்லை விடுங்க. எவ்வளவோ செலவு பண்றோம். வீட்டில் புக்குனு ஒண்ணு இருக்கறது நல்லதுதானே?'' என்றார். இரண்டே புத்தகங்கள் உள்ள தம் பூஜையறை நூலகத்தில் மூன்றாவதாக இப்படியொரு புத்தகம் சேர்ந்த மகிழ்ச்சி அவர் முகத்தில் தெரிந்தது.
அவருக்கும் மெகா சீரியல் கவலைதான் அதிகமாக இருந்தது. ""இவ்வளவுக்கும் காரணம் இந்த இன்ஸ்பெக்டர்தான்'' என்றார் டி.வி.யைக் காட்டி.
மக்களின் அறியாமை, அலட்சியம், கொடுமை கண்டு பொங்காத மனநிலை, சகிப்புத் தன்மை, அக்கறை இன்மை எல்லாமுமாகச் சேர்ந்து என்னுடைய ஆவேசத்தை அதிகப்படுத்தியது. இதற்காக சுப்ரீம் கோர்ட் வரைகூட சென்று வாதாடுவது என்று தீர்மானித்தபோது மணி இரவு 12}ஐக் கடந்துவிட்டது.

காலை நான் பள்ளிக் கூடத்துக்குள் நுழைந்து பள்ளியின் தாளாளர் அறையை நோக்கி வேகமாக நடைபோட்டேன். தாளாளரின் கார் பிரமாண்டமாக நின்றிருந்தது. சில வாரங்களுக்கு முன்பு அவர் வார இதழ் ஒன்றுக்கு அளித்த பேட்டி நினைவுக்கு வந்தது. வேலை ஏதும் கிடைக்காமல் தாம் பட்ட கஷ்டத்தையும் பிறகு பள்ளிக் கூடம் தொடங்க முடிவெடுத்து வாழ்க்கையில் முன்னேறியது பற்றியும் அவர் அதில் கூறியிருந்தார். "வாழ்க்கையில் வென்றவர்கள்' என்ற தன்னம்பிக்கைத் தொடரில் அது வெளியாகியிருந்தது. இரவு ஏற்பட்ட ஆவேசம் சற்றும் குறையவில்லை எனக்கு. அவருடைய காரைப் பார்த்ததும் அது அதிகரித்தது என்றுதான் சொல்ல வேண்டும்.
நான் தாளாளர் அறை நோக்கி வேகமாக நடைபோடுவதைப் பார்த்த காவலாளி படுவேகமாக வந்து என்னைத் தடுத்தான். ""யாரைப் பார்க்கணும்?''
""கரஸ்பாண்டன்ட்''
""அதெல்லாம் சாயங்காலம் நாலு மணிக்கு மேலதான். கிளம்புங்க''

""வழி விடுய்யா''
""யோவ் நில்லுய்யா'' என்றான் அதே மரியாதையுடன்.
எங்கே கழுத்தைப் பிடித்து வெளியே தள்ளிவிடுவானோ என்று சற்றே தயக்கமாக இருந்தது. அவமானப்படுத்திவிட்டான் என்றால் பிறகு எல்லாமே ஏடாகூடமாகிவிடுமே!
சட்டென என் விசிட்டிங் கார்டை எடுத்து நீட்டினேன்.
இரவு நேரங்களில் வீடு திரும்பும்போது போலீஸ்காரன் சந்தேக கேஸ் என்று மடக்கினால் காட்டுவதற்காக அச்சடித்து வைத்திருந்த விசிட்டிங் கார்டு. அதைப் பார்த்து அவன் உடனடியாக மரியாதை கொடுத்தான் என்று சொல்ல முடியாது. என் பெயருக்கு முன்னால் எழுத்தாளர் என்று அதில் போட்டிருந்தேன். ""இதைச் சொல்ல வேண்டியதுதானே? என்னமோ புர்ர்ருனு போறீயே? இங்கயே நில்லு கேட்டுட்டு வந்து சொல்றேன்'' என்றான்.
விசிட்டிங் கார்டுக்கு நல்ல மரியாதை இருந்தது. போன வேகத்தில் காவலாளி வந்து அழைத்தான். காவாளியிடம் அலட்சியத்தைக் காட்டிவிட்டு தாளாளர் அறைக்குள் நுழைந்தேன். அவரைத் தவிர அங்கு மூன்று பேர் இருந்தார்கள். இருவர் பணியாட்கள். அவருடைய சிந்தனைகள் நூலின் வெளியீட்டுவிழா படத்தை பெரிய சைஸில் ஃபிரேம் போட்டு, அதைச் சுவரில் மாட்டுவதற்கான வேலை நடந்து கொண்டிருந்தது.
""வாங்க, எழுத்தாளர். இந்த ஃபோட்டோவை இங்கே மாட்டலாமா பாருங்கள்'' என்று அபிப்ராயம் கேட்டார் தாளாளர். முரட்டு உருவம். பில்டிங் மேஸ்திரி ஆறுமுகம் ஞாபகத்து வந்தார். விபூதியும் குங்குமமும் நெற்றி நிறைய ஆக்ரமித்திருந்தன. அவருக்கு எதிரில் வேறொருவர் உட்கார்ந்திருந்தார். ""இவர்தான் கவிஞர் கவிமுகிலன்'' என்னை நோக்கிச் சொல்லிவிட்டு, ''இவர்....'' என்றபடி என் விசிட்டிங் கார்டில் பெயரைத் தேடினார். கார்முகிலன் அந்தப் போட்டோவில் புத்தகம் வெளியிட்டுக் கொண்டிருந்தார்.
""உங்களோட புத்தகத்தைப் பார்த்தேன்''
அவருடைய மேஜை அறையைத் திறந்து அவருடைய புத்தகத்தை எனக்கு அன்பளிப்பாகத் தருவதற்கு எத்தனித்தவர், நான் இப்படிக் கூறியதும் அதை மறுபடி உள்ளே வைத்துவிட்டு ""எப்படி இருந்தது சொல்லுங்க'' என்று பெருமிதம் பொங்க பாராட்டுகளைப் பெறுவதற்காகக் காத்திருந்தார்.
அந்தச் சூழ்நிலையை எதிர் கொள்ள முடியாமல் தவித்தேன்.
""உண்மை பேச வேண்டும் என்பதும் உழைத்து முன்னேற வேண்டும் என்பதும் எப்படி உங்களுடைய சிந்தனையாகும்?'' என்றேன் ஒரு திடீர் உந்துதலில்.
அந்த அறையில் இருந்த நான்கு பேருமே அதிர்ச்சியுடன் திரும்பிப் பார்த்தனர். தாளாளரும் இதை எதிர்பார்க்கவில்லை. ஃபோட்டோ மாட்டிக் கொண்டிருந்தவர்களுக்கு என்ன சைகை செய்தாரோ இருவரும் வெளியேறினர்.
""நீ மட்டும் என்ன பிரமாதமா எழுதிட்டே?'' ஒருமையில் கேட்டார்.
""நான் உங்களைவிட சிறப்பா எழுதுவேன் என்று நிரூபிப்பதற்காக வரவில்லை. எழுத்தாளர் என்ற முறையிலும் வரவில்லை. என் குழந்தையிடம் இந்தப் புத்தகத்தைக் கொடுத்து 25 ரூபாய் வாங்கியிருக்கிறீர்கள். இந்தப் புத்தகத்தை வாங்குவதில் எனக்கு உடன்பாடில்லை''
""இப்ப என்ன 25 ரூபாய் வேண்டுமா?'' என்றபடி ஆவேசமாக பர்ûஸ எடுத்து ஒரு நூறு

ரூபாய் தாளை எடுத்து என் முன் வீசினார்.
""எனக்கு 25 ரூபாய் தந்தால் போதும்'' என்றேன்.
""ஃபிஸ் கவுண்டரில் போய் வாங்கிக்க'' என்றபடி இண்டர்காமில் தகவல் சொன்னார்.
""நீங்க போகலாம்... வயிற்றெரிச்சல் கிராக்கிங்க''
""புலவர்களுக்குள் சச்சரவு ஏற்படுவது சகஜம்தான்... கம்பனுக்கும் ஒட்டக்கூத்தனுக்கு ஏற்படாத சச்சரவா?'' தாளாளர் முன் அமர்ந்திருந்தவர் சமாதானம் செய்து கொண்டிருந்தார்.





தமிழ்மகன்,

tamilmagan2000@gmail.com

கிழக்குக்கடற்கரை சாலையை விரும்பும் சந்தியா!

சினிமா சான்ஸ் கிடைத்திருக்கவில்லையென்றால் எந்தக் கல்லூரியில் படித்துக் கொண்டிருந்திருப்பீர்கள்?
இந்த ஆண்டுதான் பத்தாம் வகுப்பு தேர்வு எழுதப் போகிறேன். அதில் பெறும் மார்க்கை வைத்துதான் மேற்கொண்டு என்ன படிப்பது என்று யோசிக்க முடியும்.


எது உங்கள் சாய்ஸ்...? புடவை? அல்லது மாடர்ன் ட்ரஸ்...?
சுடிதார்.


எப்படி நடிக்க வந்தீர்கள்?
சினிமா துறையில் மானேஜராக இருக்கும் மனோஜ் எங்கள் பேமிலி நண்பர். ஒரு விளம்பரப் படத்துக்காக என்னை பள்ளிக்கூட யூனிபார்மிலேயே போட்டோ எடுத்து வைத்திருந்தார். "காதல்' படத்துக்குப் பள்ளிக்கூட மாணவி வேடத்துக்கு கேட்டபோது, அந்தப் போட்டோக்களையே இயக்குநர் பாலாஜி சக்திவேலிடம் காட்டினார். அவருக்குப் பிடித்துப் போக, அடித்தது யோகம்.


பார்ப்பதற்கு வெயிட்டாகத் தெரிகிறீர்களே?
பார்ப்பதற்கு அப்படித் தெரிகிறேன். நான் 49 கி.கி.தான்.

என்ன விரும்பி சாப்பிடுவீர்கள்?
பிட்சா.


செல்லப் பெயர்?
அம்மு. நிஜப் பெயர் ரேவதி. சினிமாவுக்கு சந்தியா.


அடிக்கடி செல்ல விரும்பும் பிரதேசம்?
கிழக்குக் கடற்கரை சாலை.


சமீபத்தில் எதற்காக அதிர்ச்சி அடைந்தீர்கள்?
சந்தியா தண்ணி அடிச்சுட்டு கலாட்டா என்று எழுதிவிட்டார்கள். முதலில் அதிர்ச்சியாக இருந்தது. நான் குடித்துவிட்டு கலாட்டா செய்வதைக் கற்பனை செய்து பார்த்தபோது சிரிப்புதான் வந்தது.


ஒரு பாட்டுக்கு ஆட கூப்பிட்டால் செல்வீர்களா?
என்னைப் பார்த்து யாரும் ஒரு பாட்டுக்கு ஆடக் கூப்பிட மாட்டார்கள் என்று நம்புகிறேன். குடும்பப் பாங்கான வேடத்தில் நடிப்பவர்களுக்கு இப்படியான அழைப்புகள் வருவதில்லை.


அடிக்கடி முணுமுணுக்கும் பாடல்...?
அது அப்பப்ப மாறுபடும். இப்போதைக்கு நான் நடித்து நானே பாடிய "மஞ்சள் வெயில்' படத்தின் பாடல்.

25 ஆயிரம் மாணவர்கள்... ஒரு டிஸ்க் ஜாக்கி!

குதிரை ரேஸில் மட்டுமே கேள்விபட்டிருந்த ஜாக்கிகள் இப்போது பல்வேறு துறைகளிலும் அடிபட ஆரம்பித்திருக்கிறார்கள். ரேடியோ ஜாக்கிகள், விடியோ ஜாக்கிகளைத் தொடர்ந்து இப்போது உலகமெங்கும் பிரபலமாகி வருவது டிஸ்க் ஜாக்கிகள்...

கல்யாண விழாக்கள், பிறந்தநாள் நிகழ்ச்சிகள் தொடங்கி கார்பரேட் கொண்டாட்ட களேபரங்கள் வரை வந்திருப்பவர்களை ஆட்டம் பாட்டம் கொண்டாட்டத்துடன் மகிழ்விப்பதற்கு உருவாக்கப்பட்டிருக்கும் புதிய கலாசாரம்தான் டிஸ்க் ஜாக்கி உலகம். பிரபலமான சினிமா பாடல்களைச் சுடச்சுட ரீமிக்ஸ் செய்து பாடி, ஆடி என்டெர்டெய்ன் செய்பவர்கள் டிஸ்க் ஜாக்கிகள். பார்ட்டி அரங்குகளில் இவர்களுக்காக உருவாக்கப்பட்டிருக்கும் வட்டமேடை (?) டிஸ்க் என்று அழைக்கப்படுகிறது. சரி.. ஜூட். சர்வ தேச அளவில் புகழ் பெற்று இருக்கும் டிஜே'வான நாஷா சமீபத்தில் நேச்சுரல் நிறுவனத்தின் புதிய கிளையின் திறப்புவிழாவுக்காக மும்பையிலிருந்து சென்னை வந்திருந்தார். அவர் நமக்களித்த பேட்டிக்குப் போவோமா?


உங்களுக்கு டிஜே லட்சியம் ஏற்பட்டது பற்றி சிறுகுறிப்பு?

இயற்பெயர் ரித்தேஷ் டி'úஸôசா. அப்பா, அம்மாவுக்கு இசையில் அதீத ஆர்வம் இருந்தது. நான் ஒரு ராக் ஸ்டார் ஆக வேண்டும் என்றுதான் நினைத்தேன். ஆனால் டி.ஜே.வில்தான் சாதிக்க வேண்டும் என்று எனக்கு எழுதியிருக்கிறது. 1999-ல் முதல் அரங்கேற்றம். தொடர்ந்து உலகம் முழுதும் பல்வேறு நிகழ்ச்சிகளில் பங்கேற்றாகிவிட்டது. எம்.டி.வி.யின் மிக நீண்ட நடன நிகழ்ச்சிக்காகப் பாடி கின்னஸ் சாதனையும் செய்தாகிவிட்டது.





உங்கள் நிகழ்ச்சியின் அரிய சந்தர்ப்பங்கள் என்று எதை நினைக்கிறீர்கள்?

ஜாகீர் ஹுசைன், யூ.ஸ்ரீனிவாஸ், செல்வகணேஷ், சிவமணி, ரஞ்சித் பரோட் போன்றவர்களுடன் இணைந்து பணியாற்றிய நேரங்களை என்னால் மறக்கவே முடியாது.

பொழுதுபோக்குவதற்காக

உங்களை அழைக்கிறார்கள். ஏதாவது சந்தர்ப்பத்தில் அலுப்பு ஏற்பட்டு மக்கள் மத்தியில் சலசலப்பு ஏற்பட்ட சம்பவம் நடந்திருக்கிறதா?

அப்படி நடக்க வாய்ப்பே இல்லை. டி.ஜே.வின் அடிப்படை அம்சமே உற்சாகம்தான். நாங்கள் கலந்து கொள்ளும் விழா எத்தகையது என்பதை முன்னரே தெரிந்து கொள்வதால் அதற்கான தயாரிப்புகளோடு இருப்போம். உதாரணத்துக்கு புனேவில் 25 ஆயிரம் மாணவர்கள் கலந்து கொண்ட இண்டர் காலேஜ் நிகழ்ச்சி. மாணவர்களைக் கட்டுக் கோப்பில் வைத்திருப்பது சாதாரண விஷயமா? ஆனால் நான் நடத்திய நிகழ்ச்சிகளிலேயே மிக சிறப்பாக அமைந்த நிகழ்ச்சி அதுதான்.

டிஜே'வுக்கு விடப்பட்ட சவாலே அந்த நிமிடத்தில் மகிழ்ச்சிப்படுத்துவதுதான்.

இந்த விஷயத்தில் உங்களுக்குக் குரு யார்?

குரு என்று சொல்ல முடியாது. ஆனால் என் ஃபேவரைட் ஆசாமி இங்கிலாந்தைச்

சேர்ந்த "டிஜே' ஸ்க்வீன்.


வேறு இசை முயற்சிகள்?

இந்திப் படங்களுக்கு ரீமிக்ஸ் செய்ய அழைக்கிறார்கள். படங்களுக்குச் செய்வதை நான் அவ்வளவாக விரும்புவதில்லை. ஆன் தி ஸ்பாட் ரீமிக்ஸில்தான் த்ரில். "முட்ஷே சாதிக்கரோ' படத்துக்கு ஒரு ரீமிக்ஸ் செய்திருக்கிறேன். டிஜே அகாடமி ஒன்று துவங்கியிருக்கிறேன். ஏராளமான இளைஞர்கள் ஆர்வத்துடன் வந்து சேர்கிறார்கள். இது ஒரு மகிழ்ச்சியூட்டும் முயற்சி என்ற விதத்தில் என் வேலை எனக்கு மிகவும் பிடித்திருக்கிறது.

தமிழ்மகன்

படங்கள்:மீனம் மனோ

ஒன்பது ரூபாய் நோட்டையொட்டி..!

தமிழ் நாவல்கள் திரைப்படங்களாவது பல சந்தர்ப்பங்களில் பலத்த விமர்சனத்துக்கு ஆளாகும்படிதான் ஆகியிருக்கிறது. எழுத்தின் சுவையை ஃபிலிம் சுருள் சாப்பிட்டுவிட்டதாக உலகு தழுவிய புகார் உண்டு.

இந்தப் பிரச்சினை தீருவதற்கு கதாசிரியர்களே இயக்குநர்கள் ஆனால்தான் உண்டு. உன்னைப் போல் ஒருவன் கதையை எழுதி, அதை இயக்கியும் இருந்தார் ஜெயகாந்தன். அப்படி தானே எழுதி தானே இயக்கியவர் வரிசையில் இடம் பெற்றிருக்கிறார் தங்கர் பச்சான். அவருடைய ஒன்பது ரூபாய் நோட்டு நாவல் சமீபத்தில் சினிமாவாகி உள்ளது.

தமிழில் சிறப்பாகப் போற்றப்பட்ட பல நாவல்கள் சினிமா ஆகியிருக்கின்றன. பரவலாக ரசிக்கப்பட்ட பல நாவல்கள் சினிமாவாக ரசிக்க முடியாமல் போயிருக்கின்றன. ""1935-ல் வடுவூர் துரைசாமி ஐயங்காரின் "மேனகா', "திகம்பர சாமியா'ரில் இருந்தே நாவல்கள் திரைப்படங்களாகியிருக்கின்றன. அகிலனின் "குலமகள் ராதை', "பாவை விளக்கு', "கயல்விழி' (மதுரையை மீட்ட சுந்தர பாண்டியன்) நாவல்கள் திரைப்படங்களாகியிருக்கின்றன. கல்கியின் "தியாக பூமி', "கள்வனின் காதலி', "பார்த்திபன் கனவு' போன்ற கதைகளும் மக்களால் கதையாகவும் சினிமாவாகவும் வரவேற்கப்பட்டன.

கொத்தமங்கலம் சுப்புவின் "தில்லானா மோகனாம்பாள்', நாமக்கல் கவிஞரின் "மலைக்கள்ளன்' ஆகியவை நாவலைவிடவும் பெரிய அளவில் சினிமாவாகச் சிலாகிக்கப்பட்டவை'' என்கிறார் சினிமா விமர்சகரும் திரைப்பட மக்கள் தொடர்பாளருமான பெரு. துளசி பழனிவேல்.

""மக்களுக்குச் சினிமா பொழுது போக்கு அம்சமாகவே உள்வாங்கப்பட்டிருக்கிறது. காமெடியும், அடிதடியும், கண்ணீரும் அதில் குறிப்பிட்ட விகிதத்தில் கலந்து கலர் ஃபுல்லாக வழங்கப்பட வேண்டும். ஆனால் வாசிப்பு அனுபவம் முற்றிலும் வேறுவிதமானது. கதையுலகில் ஆராதிக்கப்படும் ஆயிரம் பக்க "அன்னா கரீனி'னாவையும் "மோகமுள்'ளையும் சினிமாவாக்கும் போது இது இன்னும் பட்டவர்த்தனமாகத் தெரிய ஆரம்பிக்கிறது'' என்கிறார் ஓர் உதவி இயக்குநர்.

சுஜாதாவின் "காயத்ரி', "கரையெல்லாம் செண்பகப் பூ', "இது எப்படி இருக்கு' நாவல்களுக்குக் கிடைக்காத வரவேற்பு, மகரிஷியின் "புவனா ஒரு கேள்விக்குறி', "பத்ரகாளி' படங்களுக்குக் கிடைத்தது. வாசக வெற்றி திரைப்பட வெற்றிக்குப் போதுமானதாக இல்லாத நிலை இது. அறிஞர் அண்ணாவின் ரங்கோன் ராதா, படமானபோது அது பரவலாக வரவேற்கப்படவில்லை.

மகேந்திரன் சில படங்களே இயக்கியிருந்தாலும் அவற்றில் பெரும்பாலானவை நாவல்களே. திறமையான கலைஞர்களால் கதைகளை அதன் சாராம்சம் கெடாமல் திரைப்படங்களாக்க முடியும் என்பதற்கு அவர் ஓர் உதாரணம். உமா சந்திரனின் "முள்ளும் மலரும்', புதுமைப்பித்தனின் "சிற்றன்னை'யைத் தழுவி எடுத்த "உதிரிப் பூக்கள்', பொன்னீலனின் "பூட்டாத பூட்டுகள்', சிவசங்கரியின் "நண்டு' போன்ற நாவல்களைப் படமாக்கியிருக்கிறார் மகேந்திரன்.

""இருந்தாலும் சினிமா இயக்குநர்கள் அவர்கள் நேசித்து உருவாக்கிய கதையை உரசிப்பார்த்துக் கொள்ளவும் சரி பண்ணிக் கொள்ளவும்தான் தமிழ் எழுத்தாளர்களைப் பயன்படுத்திக் கொள்கிறார்கள். அதனால்தான் சுஜாதா, பாலகுமாரன், ஜெயமோகன், எஸ்.ராமகிருஷ்ணன், பட்டுக்கோட்டை பிரபாகர், சுபா போன்ற பல எழுத்தாளர்கள் வசனகர்த்தாக்களாக்கப்பட்டிருக்கிறார்கள் இப்போது'' என்கிறார் பழனிவேல்.

சினிமா வேறு வாழ்க்கை வேறு என்று சாதாரணமாக ஒரு பிரயோகம் உண்டு. சினிமா வேறு; நாவல் வேறு என்பதும் நமக்குப் பொருத்தமாக இருக்கும் போலிருக்கிறது.

எதிர்மென் அரக்கன்

சண்டை இந்தியன் வார இதழில் வெளியான என் விஞ்ஞான சிறுகதையான எதிர் மென் அரக்கன் இதோ உங்கள் பார்வைக்கு...

நாம் நம்பிக்கொண்டிருக்கும் கணினியும் மென் பொருள்களும் ஒருநாள் இப்படி காலை வாரினால் கிடைக்கும் ஒவ்வொரு தகவலும் நம்மை எப்படி பாடாய் படுத்தும் என்ற துக்ககரமான நகைச்சுவைக் காட்சி இது...

science fiction (part 1)

science fiction-2

science fiction-3

"பரட்டை என்ற அழகு சுந்தரம்' - RAJINI' STORY PART-1

ரஜினியை வைத்து எழுதப்பட்ட படக் கதை இது. குங்குமம் இதழில் வெளியான போது பெரும் வரவேற்பைப் பெற்ற இந்தக் கதையை வலைப் பூ வாசகர்களுக்கு முன் வைக்கிறேன்.

"பரட்டை என்ற அழகு சுந்தரம்' என்ற கதா பாத்திரத்தில் ரஜினி...

part-2

part-3

சேவை: மனம் இருந்தால் "மார்க்' உண்டு!

மன வளர்ச்சி குன்றியோர் காப்பகங்கள் பல உருவாகியுள்ளன. ஆனால் அவர்களை அவர்களே காத்துக் கொள்வதற்கான பயிற்சிகளும் அளிக்கப்படும் அமைப்புகள் அவற்றில் சிலவே.

இத்தகையவர்களுக்காகக் கடந்த 22 ஆண்டுகளாக சென்னை கோட்டூர்புரத்தில் இயங்கி வந்த ஸ்பாஸ்டிக் சொûஸட்டி ஆஃப் இந்தியா அமைப்பு, இப்போது "வித்யாசாகர்' என்ற பெயரில் இயங்கத் தொடங்கியிருக்கிறது. ஏன் இந்தப் பெயர் மாற்றம் என்று அவர்களிடம் காரணம் கேட்ட போது, ""பெயரில்கூட அவர்களின் மன வளர்ச்சியை நினைவுபடுத்தி காயப்படுத்த வேண்டாம் என்பதால்தான்'' என்கிறார் ஜெயந்தி நடராஜன். இந்த அமைப்பின் விற்பனை மற்றும் வேலைவாய்ப்புப் பிரிவைச் சேர்ந்தவர் இவர். இத்தகையவர்களுக்கான வேலைவாய்ப்புகளுக்காகவும் முனைப்பாகச் செயல்பட்டு வருகிறார்.




""கடந்த 22 ஆண்டுகளாக மூளை முடக்குவாதம் சம்பந்தமான ஊனமுற்றோரின் மேம்பாட்டுக்காகவும் மாணவர்களைப் பயிற்றுவிக்கவும் பாதுகாக்கவும் செயல்பட்டு வந்த நாங்கள் இப்போது அவர்களுக்கு இலவசமாகத் தொழிற் பயிற்சிகள் அளிக்கவும் ஆரம்பித்திருக்கிறோம்.

எந்தப் பணி இடத்திலும் ஆங்கிலத்தின் தேவை அதிகரித்து வருவதால் அதற்கான பயிற்சியை அளிக்கிறோம். கணினி சம்பந்தமான குறைந்தபட்ச திறன் இப்போது எல்லா துறைகளிலும் தேவையாகிவிட்டது. அதற்கான பயிற்சியையும் "பிஹேவியரல் ஸ்கில்' எனப்படும் நடத்தைத் திறனுக்கான பயிற்சியையும் அளிக்கிறோம். இவையாவும் இரண்டு மாத இலவச பயிற்சித் திட்டங்களாகும். நடத்தைத் திறன் என்பது உளவியல் ரீதியாக அவர்களை செழுமைப்படுத்துவதாகும். பழகும் தன்மை, செய்தியை விளங்க வைக்கும் திறமை போன்றவை சம்பந்தமானது.




18 வயது முதல் 35 வயதுக்கு உட்பட்ட உடல் ஊனமுற்ற யாவரும் இதில் சேரலாம். உடல் ஆரோக்கியத்துடன் எல்லா திறமையும் இருந்தும் போட்டியை எதிர் கொள்வதற்கான மனோ தைரியம் இல்லாதவர்கள் இருக்கும் சூழலில் எங்களிடம் பயிற்சி பெறுபவர்களின் கண்களில் தெரியும் நம்பிக்கை ஒளி உண்மையில் பிரமிக்க வைக்கிறது'' என்கிறார் அவர்.

மனசுகள் முடங்காதவரை எதுவும் யாரையும் எதுவும் முடக்கிவிடமுடியாதுதானே? மனம் இருந்தால் "மார்க்' உண்டு!

இம்போர்ட்டட் சரக்கு:

மகிழ்ச்சியின் நிறம் எது?

அந்த சர்ச் களை கட்டியிருந்தது. திருமணத்துக்கான ஏற்பாடு. மணமகளும் மணமகனும் திருமண ஆடையில் மகிழ்ந்திருந்தனர்.

திருமணத்துக்கு வந்திருந்த பீட்டர் தன் அம்மாவிடம் கேட்டான்:

மணமகள் எதற்கு வெள்ளை உடை அணிந்திருக்கிறாள்?

சற்றே யோசித்த அம்மா, ""மகிழ்ச்சியின் நிறம் வெண்மை. இது அவளுடைய மகிழ்ச்சியான நாள். அதனால் வெள்ளை உடை அணிந்திருக்கிறாள்'' என்றார்.

பீட்டர் கொஞ்ச நேரம் மணமகளைக் குழப்பமாகப் பார்த்துவிட்டு மீண்டும் கேட்டான்:

""அப்படியானால் மணமகன் கருப்பு கோட் அணிந்திருக்கிறாரே அது?''












ஜெயித்தது எப்படி?

விக்டருக்கு அது முதல் வழக்கு. எப்படியும் ஜெயித்து விட வேண்டும் என்று தீவிரமாக வாதாடினான். ஆனால் சாட்சியங்கள் சரியாக இல்லை. எப்படியும் தீர்ப்பு தம் கட்சிக்காரருக்குச் சாதகமாக இருக்காது என்று தெரிந்து விட்டது. கடைசியாக ஒரு முடிவுக்கு வந்தான். தம் கட்சிக்காரரை அழைத்து ""நான் நீதிபதிக்கு லஞ்சம் கொடுப்பதற்கு முடிவு செய்துவிட்டேன்'' என்றான் விக்டர்.

""அடப்பாவி... அவர் மிகவும் நேர்மையான நீதிபதி. வேறு வினையே வேண்டாம்'' என்று பதறினான் அந்த பிசினஸ்மேன். விக்டரோ லஞ்சம் கொடுப்பதில் தீவிரமாக இருந்தான்.

இரண்டாம் நாள் தீர்ப்பு வாசிக்கப்பட்டது. பிசினஸ்மேன் விடுதலை ஆனான். பிசினஸ்மேன் ""எப்படி?'' என்றான்.

""நான் வெகுமதி அனுப்பி வைத்தது உண்மைதான். ஆனால் அத்துடன் எதிர்க்கட்சி வக்கீலின் விசிட்டிங் கார்டை அல்லவா இணைத்து அனுப்பினேன்?'' தோளைக் குலுக்கிக் கொண்டு சொன்னான் விக்டர்.

இம்போர்ட்டட் சரக்கு!:

பாவத்தின் விளைவு



உபதேசங்களை வாரி வழங்கினார் ஒரு சாமியார். பயபக்தியாய் தினமும் கேட்டுவந்தான் ஒரு சீடன். ஒருமுறை சாமியாரிடம், ""நமக்கு கடவுள்தான் எல்லாம். கடவுளை எப்போதும் நம்பு. அவர் எப்போதும் உன்னைக் காப்பாற்றுவார் என்று சொன்னீர்களே... நேற்றடித்த பெரும்புயலில் என் குடிசை விழுந்துவிட்டது'' என்று கோபமாகச் சொன்னான் சீடன்.

""அது நீ செய்த பாவத்தின் விளைவு'' என்றார் சாமியார்.

""உங்கக் குடிசையும்தான் விழுந்துவிட்டது. அது உங்கள் பாவத்தின் விளைவா?'' திரும்பக் கேட்டான் சீடன்.

புன்னகை மாறாமல் சீடனை ஆசிர்வதித்தபடியே சொன்னார்: ""நல்லவர்களையும் கடவுள் சோதிப்பதுண்டு.''







மனம் எனும் பூதம்!



மார்ட்டின் கடவுள் நம்பிக்கை இல்லாதவன். நடுக்கடலில் படகில் மீன் பிடித்துக் கொண்டிருந்தபோது திடீரென்று ஒரு சுறாமீன் அவனது படகை முட்டித் தள்ளியது. படகு 10 அடி உயரத்துக்குப் பறந்தது. கீழே விழுந்து கொண்டிருந்தபோது ""கடவுளே காப்பாற்று'' என்றான் அனிச்சையாய். உடனே அவன் அந்தரத்தில் அப்படியே உறைந்தபடி இருந்தான். கடவுள் அவன் முன் தோன்றினார். ""உன்னைக் காப்பாற்றிக் கொள்வதற்கு என்ன வரம் வேண்டும் கேள்'' என்றார்.

எனக்குக் கடவுள் நம்பிக்கை வந்தது மாதிரி சுறாமீனுக்கும் கடவுள் நம்பிக்கை வந்துவிட்டால் அது தன்னைக் கொல்லாதென்று நினைத்தான் மார்ட்டின். ""சுறாவுக்கும் கடவுள் நம்பிக்கை தா'' என்றான்.

""சரி'' என்றார் கடவுள்.

அடுத்த வினாடி சுறா, ""கடவுளே எனக்கு இரை தந்ததற்கு நன்றி'' என்றது. மார்ட்டின் சுறாவின் வயிற்றுக்குள் சென்றான்.

இம்போர்ட்டட் சரக்கு: நியாயமான பயம்!



டாக்ஸியில் உட்கார்ந்திருந்த மில்டன் டிரைவரிடம் ஏதோ சந்தேகம் கேட்கும் நோக்கத்தில் அவன் தோளைத் தட்டி அழைத்தான். அவ்வளவுதான். டிரைவர் மிரண்டு போய் ப்ளாட்பார்ம் மீதும் மரங்களை உராய்ந்தும் தாறுமாறாய் காரை ஓட்டி காரை தடாலென நிறுத்தினான்.

""என்ன மிஸ்டர்... சும்மா இப்படி கூப்பிட்டதற்கு இவ்வளவு பயந்துட்டீங்களே?'' என்றான் மில்டன்.

""இது உங்கள் தவறு இல்லை. நான் இதுவரைக்கும் சவ வண்டிக்குத்தான் டிரைவராக இருந்தேன். எனக்குப் பின்னால் பிணத்தைத் தவிர வேறு எதுவும் இருந்ததில்லை. அதனால்தான்'' என்றான் டிரைவர்.





இம்போர்ட்டட் சரக்கு: கண்டுபிடிச்சேன்... கண்டுபிடிச்சேன்...

மனநல காப்பகத்தில் தம் உறவினரைப் பார்ப்பதற்காக வந்திருந்தான் அவன். தலைமை மருத்துவரைப் பார்த்து மனநலம் பாதிக்கப்பட்டவர் என்பதை நீங்கள் எப்படிக் கண்டுபிடிக்கிறீர்கள்? என்று விசாரித்தான்.

தலைமை மருத்துவர் விவரித்தார். எளிய சோதனை மூலம் கண்டுபிடிப்போம். இந்த பாத் டப்பில் நீரை நிரப்புவோம். பிறகு ஒரு ஸ்பூன், ஒரு டீ கப், ஒரு பக்கெட் மூன்றையும் அருகில் வைத்து விடுவோம். பாத் டப்பில் உள்ள நீரை அகற்றச் சொல்வோம்.

கேள்வி கேட்டவன், ""புரிந்து விட்டது. பக்கெட் மூலம் நீரை வேகமாக அப்புறப்படுத்துபவன் மனநலம் பாதிக்கப்படாதவன் அப்படித்தானே?''

""இல்லை. நார்மல் ஆசாமியாக இருந்தால் பாத் டப்பில் கீழே இருக்கும் ப்ளக்கை அகற்றி நீரை அப்புறப்படுத்துவான். ...ஓ.கே. உங்களுக்கு அந்த ஜன்னலோர படுக்கை போதுமா பாருங்கள்!''

இம்போர்ட்டட் சரக்கு: 18

காது கேட்கலை!

வெளியூருக்கு வந்த இடத்தில் டேவிட்டின் கார் ரிப்பேர் ஆகிவிட்டது. தந்தைக்கு ட்ரங்கால் போட்டான். ""அப்பா அவசரமாக 200 டாலர் வேண்டும்''

""சரியா கேக்கல.... என்னப்பா சொல்றே?''

""200 டாலர்.... 200!

""லைன் சரியா இல்ல. சுத்தமா கேக்கல''

""கார் ரிப்பேர்... 200 டாலர் வேணும்''

""சாரிப்பா... கேக்கல''

டெலிபோன் ஆபரேட்டர் இடைமறித்து... ""உங்கள் மகன் சொல்வது எனக்கு நன்றாகக் கேட்குது'' என்றான்.

""அப்படி இருந்தா நீயே 200 டாலரைக் கொடு'' என்று போனை வைத்துவிட்டார் தந்தை.

இம்போர்ட்டட் சரக்கு 17

ஆதர்ச தம்பதி


அறுபதுகளில் இருந்த அந்தத் தம்பதிகள் தங்களுடைய 40-வது திருமண நாளைக் கொண்டாடிக் கொண்டிருந்தனர்.

அவர்கள் முன் தேவதை ஒன்று தோன்றி, ""உங்களைப் போன்ற ஆதர்ச தம்பதிகளுக்குத் தலா ஒரு வரம் தர விரும்புகிறேன்'' என்றது.

மனைவியோ ""நான் என் கணவருடன் உலக நாடுகள் முழுவதையும் சுற்றிவர விமான டிக்கெட் வேண்டும்'' என்றாள்.

அடுத்த வினாடி டிக்கெட்டுகள் வந்து சேர்ந்தன.

அடுத்து கணவனின் முறை. தேவதை அவன் பக்கம் திரும்பியது. கணவன் ரகசியமாக தேவதையின் காதில் சொன்னான்:

""என் மனைவிக்குப் பதிலாக என் கேர்ள் ஃப்ரண்ட் பெயருக்கு டிக்கெட்டை மாற்றித் தரமுடியுமா?''

இம்போர்ட்டட் சரக்கு!:15,16

மைக்ரோ கதை: மன்னரும் மாம்பழமும்!

அவன் ஒரு சாப்பாட்டு ராமன். மன்னரின் விருந்துக்கு அவனையும் அழைத்திருந்தனர். கூச்ச நாச்சமில்லாமல் சாப்பிட்டான். மூன்று பந்தி காலியாகும் வரை முதல் பந்தியில் அமர்ந்த அவன் சாப்பிட்டுக் கொண்டே இருந்தான். மன்னர் அவனுடைய சாப்பாட்டுப் பிரியத்தைத் தூரத்தில் இருந்து ரசித்துக் கொண்டிருந்தார்.

வயிறு முட்ட சாப்பிட்டுவிட்டு எழுந்திருக்க முடியாமல் எழுந்தான் அவன். மன்னர் கிண்டலாக, ""இன்னும் கொஞ்சம் சாப்பிடலாமே?'' என்றார்.

""ஒரு பருக்கைகூட சாப்பிட முடியாது'' என்றான் அவன்.

அந்த நேரம் பார்த்து ஒரு தட்டு நிறைய மாம்பழத் துண்டுகளை எடுத்துச் சென்றான் ஒருவன். சாப்பாட்டு ராமனுக்கு நாக்கில் எச்சில் ஊறியது. உடனே அவனுக்கு மாம்பழத்துண்டுகளைப் பரிமாறச் சொன்னார் மன்னர். அவனும் ஏழெட்டுத் துண்டுகளை உள்ளே தள்ளினான்.

""இப்போதுதான் ஒரு பருக்கைகூட சாப்பிட முடியாது என்றாய். பிறகு எப்படிச் சாப்பிட முடிந்தது?'' } மன்னர் கேட்டார்.

""மன்னரே... உங்கள் சந்தேகம் நியாயம்தான். ஆனால் நெரிசலான சாலையில் திடீரென்று மன்னர் வருகிறார் என்றால் மக்கள் எல்லோரும் ஒதுங்கி நின்று மன்னருக்கு வழிவிடுவதில்லையா? அப்படித்தான் இதுவும்'' என்றான் சாப்பாட்டு ராமன்.

துணிச்சல் மிக்கவன்!

ஒரு கிராமத்தானும் அவனுடைய மனைவியும் பொருட்காட்சிக்குச் சென்றிருந்தனர். அங்கு ஹெலிகாப்டரில் பறப்பதற்கு க்யூ நிற்பதைப் பார்த்தனர். விவசாயி, ""பறப்பதற்கு எவ்வளவு?'' என்றான். ""ஒரு ரவுண்ட் சென்றுவர பத்தாயிரம் ரூபாய்'' என்றான் விமானி. ""ரொம்ப அதிகம்'' என்று விலகிச் சென்ற விவசாயியிடம், ""சரி.. உங்கள் இருவரையும் இலவசமாகவே அழைத்துச் செல்கிறேன். ஆனால் உங்கள் இருவரில் யாராவது ஒருவர் பயந்து அலறினாலும் பத்தாயிரம் ரூபாய் தந்துவிட வேண்டும்'' என்றான்.

இந்த டீலுக்கு சம்மதித்தான் விவசாயி. எப்படியாவது பணத்தைக் கறந்துவிட வேண்டும் என்ற வெறியில் ஏடாகூடமாக ஹெலிகாப்டரை ஓட்டிச் சென்றான் விமானி. எவ்வளவு பயமுறுத்தியும் ஒரு சத்தமும் இல்லை. வெறுத்துப் போய் தரையிறக்கினான்.

""சத்தமே போடவில்லையே... உண்மையிலேயே உன் துணிச்சலைப் பாராட்டுகிறேன்'' என்றான் விமானி.

விவசாயி, ""என் மனைவி கீழே விழுந்த நேரத்தில் உண்மையிலேயே கத்திவிடலாம் என்றுதான் நினைத்தேன். பிறகு அடக்கிக் கொண்டேன்'' என்றான் பெருமிதமாக.

இம்போர்ட்டட் சரக்கு!: 13,14

ஜெயித்தது எப்படி?

விக்டருக்கு அது முதல் வழக்கு. எப்படியும் ஜெயித்து விட வேண்டும் என்று தீவிரமாக வாதாடினான். ஆனால் சாட்சியங்கள் சரியாக இல்லை. எப்படியும் தீர்ப்பு தம் கட்சிக்காரருக்குச் சாதகமாக இருக்காது என்று தெரிந்து விட்டது. கடைசியாக ஒரு முடிவுக்கு வந்தான். தம் கட்சிக்காரரை அழைத்து ""நான் நீதிபதிக்கு லஞ்சம் கொடுப்பதற்கு முடிவு செய்துவிட்டேன்'' என்றான் விக்டர்.

""அடப்பாவி... அவர் மிகவும் நேர்மையான நீதிபதி. வேறு வினையே வேண்டாம்'' என்று பதறினான் அந்த பிசினஸ்மேன். விக்டரோ லஞ்சம் கொடுப்பதில் தீவிரமாக இருந்தான்.

இரண்டாம் நாள் தீர்ப்பு வாசிக்கப்பட்டது. பிசினஸ்மேன் விடுதலை ஆனான். பிசினஸ்மேன் ""எப்படி?'' என்றான்.

""நான் வெகுமதி அனுப்பி வைத்தது உண்மைதான். ஆனால் அத்துடன் எதிர்க்கட்சி வக்கீலின் விசிட்டிங் கார்டை அல்லவா இணைத்து அனுப்பினேன்?'' தோளைக் குலுக்கிக் கொண்டு சொன்னான் விக்டர்.

இம்போர்ட்டட் சரக்கு!: மனம் எனும் பூதம்!




மார்ட்டின் கடவுள் நம்பிக்கை இல்லாதவன். நடுக்கடலில் படகில் மீன் பிடித்துக் கொண்டிருந்தபோது திடீரென்று ஒரு சுறாமீன் அவனது படகை முட்டித் தள்ளியது. படகு 10 அடி உயரத்துக்குப் பறந்தது. கீழே விழுந்து கொண்டிருந்தபோது ""கடவுளே காப்பாற்று'' என்றான் அனிச்சையாய். உடனே அவன் அந்தரத்தில் அப்படியே உறைந்தபடி இருந்தான். கடவுள் அவன் முன் தோன்றினார். ""உன்னைக் காப்பாற்றிக் கொள்வதற்கு என்ன வரம் வேண்டும் கேள்'' என்றார்.

எனக்குக் கடவுள் நம்பிக்கை வந்தது மாதிரி சுறாமீனுக்கும் கடவுள் நம்பிக்கை வந்துவிட்டால் அது தன்னைக் கொல்லாதென்று நினைத்தான் மார்ட்டின். ""சுறாவுக்கும் கடவுள் நம்பிக்கை தா'' என்றான்.

""சரி'' என்றார் கடவுள்.

அடுத்த வினாடி சுறா, ""கடவுளே எனக்கு இரை தந்ததற்கு நன்றி'' என்றது. மார்ட்டின் சுறாவின் வயிற்றுக்குள் சென்றான்.